maré é un acontecemento cultural, artístico, social e profesional que (re)nace en 2020 en Compostela tras a experiencia de 15 anos de Cantos na Maré.
maré emerxe con ese mesmo espírito de sumar e compartir os valores e os talentos dos territorios da fala galego-portuguesa, convertido agora nun océano aínda máis amplo onde desembocan ríos e afluentes con novas correntes tan imprescindibles coma imparables.
Saca á superficie novos talentos, novos públicos, experimenta con eles. Colaboración, co-produción, hibridación, internacionalización artística. Moito máis ca unha simple suma de concertos.
Medra e evoluciona tras 15 anos de travesía en Pontevedra, mantendo o seu carácter diferenciador como único espazo de encontro entre artistas da lusofonía e máis alá, baixo a dirección artística de Uxía.
Nace para apoiar o crecemento da economía creativa e axudar ás organizacións artísticas e culturais a prosperar en tempos de dificultade. Espazo para a innovación, as ideas, a tecnoloxía, o coñecemento; interacción, experimentación e co-creación como ferramentas para o ecosistema da economía creativa e da cultura.
Posiciona Compostela como referencia dos negocios das industrias creativas e musicais. Aprender intercambiando experiencias, aumentar a profesionalización, internacionalización e competitividade do sector.
Programación de cinema que achega a Compostela creacións inspiradoras procedentes das culturas atlánticas con base na música, nas artes e nas experiencias xurdidas das economías creativas co foco no ben común.
Experiencia arredor dos sabores: un encontro entre chefs e música para viaxar, experimentar e descubrir os produtos e as cociñas dos territorios da maré. Cultura gastronómica rica en sabores e en historia.
Sección audiovisual da plataforma de música en streaming Tolemias, para seguir todo o pasado, presente e futuro de maré dende calquera lugar do mundo.
Os Premios da música e da poesía galego-portuguesas, aRi[t]mar, intégranse por primeira vez nun acontecemento global, sumando os seus valores ao conxunto, sen perder a súa identidade propia.
Compostela é unha cidade acolledora, integradora, plural, tolerante. Internacional. Cultural. Solidaria. Espiritual. Auténtica. Eses son os valores de maré, un evento global para satisfacer as necesidades, mesmo as inconscientes, de todo tipo de público.
Un acontecemento transversal, inclusivo, con especial interese na integración social, na educación, con atención aos máis mozos, á igualdade e ao respecto a todas as identidades e diversidades sexuais.
Os estilos musicais, as actividades propostas e a integración de aRi[t]mar fan que se superen vellas barreiras e caixóns estancos. A forza da música e da poesía, do ritmo e da rima como emoción universal, ligada pola proximidade da lingua común, achega atractivos para todas as idades e intereses. Do fado portugués ao tribalismo afro-carioca, da electro cumbia ao post punk celtic, do trad á electrónica, das voces poéticas consolidadas ás novísimas. Correntes diversas coma a propia humanidade, que converxen e se enlean neste grande océano que é maré.
