maré 21, volve este setembro a Compostela coa súa edición máis ambiciosa en propostas musicais e artísticas das dúas beiras do Atlántico

Warethwa!!

MÁIS INFO

Cunha edición renovada e á altura dos grandes festivais, maré, músicas e artes atlánticas volve do 23 ao 26 de setembro a Compostela. Serán catro días ateigados de actividades dentro dunha programación multidisciplinar que suma máis de 30 propostas musicais e artísticas procedentes dunha decena de países, que sitúan Galiza no epicentro da vangarda creativa mundial.

Xoves 23

Xoves 23 : 19:30H
Praza da Quintana

Orquesta de malabares

Pista Catro presenta este novo espectáculo xunto á Banda de Música Municipal, un dos proxectos máis orixinais e suxestivos no eido escénico estatal, que une circo e música da man dunha trintena de músicos e 6 malabaristas.

Xoves 23 : 20:00H
Teatro Principal

Luiz Caracol

O músico, intérprete e compositor nado en Elvas vén de editar só.tão, o seu EP máis recente mentres prepara o lanzamento do seu novo espectáculo que verá a luz este 2021. Autor cunha identidade moi persoal, froito da influencia entre a cidade de Lisboa, na que reside, e a ligazón cultural cos principais países de lingua portuguesa, ten contado coas colaboración de nomes tan destacados como Sara Tavares, Fernanda Abreu, Jorge Drexler, Mia Couto, Aline Frazão, Edu Mundo ou José Luis Peixoto.

Xoves 23 : 21:30H
Parque de Bonaval

Albert Pla

O recoñecido e polifacético artista, con máis de 25 anos de traxectoria na música, o teatro ou o cine, volve a Compostela co seu último espectáculo, ¿Os acordáis?, título dunha das últimas cancións que compuxo durante a pandemia, unha composición tan longa coma o tempo que durou o confinamiento.
En ¿Os acordáis? veremos un Albert Pla en estado puro, reflexionando con ironía sobre o impacto que a crise do coronavirus tivo a nivel mundial, con esa forza que ten para teatralizar as súas cancións e conseguir un espectáculo dunha poética inusual, devastadora e electrizante.

Venres 24

Venres 24 : 20:00H
Teatro Principal

Mira é Marta Miranda (OqueStrada)

MIRA é o novo proxecto da lisboeta Marta Miranda, excompoñente da formación de fado OqueStrada. Baixo este nome estrea en maré 21 o seu novo espectáculo en solitario.

© Fotos Stephane Bechaud

Venres 24 : 21:00H
Auditorio de Galicia

Ladilikan - Trio da Kali coa Real Filharmonía de Galicia

A agrupación de música de Malí, Trio Da Kali reunirase en maré 21 coa Real Fhilharmonía de Galicia nunha asombrosa actuación inédita. O trío de destacados músicos da cultura mandé do sur de Malí, actuarán nunha coprodución da Real Filharmonía de Galicia e maré coa Orquesta da RadioTelevisión Noruega e o festival Oslo World. Para este proxecto, Paul Daniel director da RFG realizará arranxos instrumentais para corda sobre música orixinal de Jacob Garchik escrita para o disco Ladilikan de Trio da Kali- Kronos Quartet (2017); unha exploración artística única, sen límites, que leva o repertorio musical de hai séculos cara a unha viaxe fascinante a través de sons atemporais.
Estamos ante o que será, sen dúbida, un encontro memorable.

Abono Venres 24 : 19:30H
Parque de Bonaval

Nación Ekeko

Dende Arxentina, a fusión de sons andinos, latinos e africanos co house, o dub e a tecnoloxía ao servizo da improvisación fan da súa música unha viaxe sonora única na que “Los indios nos están contemplando”. Nación Ekeko nace do encontro con personaxes latinoamericanos, de cantos e recitados compilados; un percorrido musical que atravesa de punta a punta as veas abertas de América Latina, cun directo que convida á interacción constante co público, nun encontro que celebra a vida a través do ritmo e a danza colectiva. Diego Pérez é o músico, compositor e produtor detrás de Nación Ekeko, que presentará Qomunidad, o novo disco lanzado a finais de abril.

Abono Venres 24 : 20:30H
Parque de Bonaval

Jéssica Caitano e Luana Flores

Nada en Triunfo, no interior de Pernambuco, Jéssica é unha artista polifacética. Cantante, compositora, rapeira, percusionista, poeta-declamadora, educadora de arte e activista LGTB+, está implicada en numerosas iniciativas culturais e sociais no seu país. En 2019 produciu xunto a Guirraiz o EP Reboco. Caitano estará acompañada da beatmaker, dj, percusionista, intérprete e compositora, tamén referente na escena musical brasileira por desenvolver un traballo innovador que abrangue temáticas como xénero, sexualidade ou territorio. Cofundadora do grupo feminista paraibano Coco das Manas, Luana pon o foco na fusión entre o electrónico e os ritmos da cultura popular do norte do Brasil, como ferramenta social para o empoderamento feminino. En outubro de 2020 lanzou xunto a Jéssica Caitano o videoclip Reza.

Abono Venres 24 : 21:30H
Parque de Bonaval

Ferrán Palau

O músico barcelonés de pop escribe e describe a súa historia coma unha paisaxe que xira a ritmo tranquilo, sosegado, pero implacable, o mesmo que a súa música. O easyloving e as canciones de amor tórnanse aínda máis sinceras en Parc, o seu quinto disco. Desta volta atoparemos un amor que doe un pouco máis, que arde con maior intensidade; un amor seducido polo minimalisto e os sintetizadores que nos guían, a paso lento, a través do seu imaxinario.

Abono Venres 24 : 22:30H
Parque de Bonaval

Bia Ferreira

Multi instrumentista, intérprete, compositora, arranxadora, produtora musical e activista, Bia Ferreira naceu no interior de Minas Gerais (Brasil) e iniciou os seus estudos na música aos 3 anos. Concibe a súa arte como MMP: “Música de Mulher Preta”. Comezou a comunicarse artisticamente para educar, concienciar e informar as persoas sobre as demandas da loita antirracista en Brasil, así como temas relacionados co movemento LGTB e o amor afrocéntrico. As súas cancións son de lectura obrigada para o acceso á educación secundaria e superior.

Abono Venres 24 : 23:30H
Parque de Bonaval

Verto

O dúo de pop con influencias do trap e o R&B máis actual, composto por Alberto Mira “Berto” e Fernando Peleteiro “Fer”, presentarán o seu novo traballo Embora, un EP de 14 cancións convertidas xa en auténticos himnos de pop electrónico para toda unha xeración.

Sábado 25

Sábado 25 : Dende as 12:00H
Parque de Bonaval

Sesión Vermú

Horarios e artistas por confirmar.

Sábado 25 : 13:00H
Teatro Principal

Maleducadas

Maleducadas

Nacho Muñoz, Chefa Alonso e Marina Oural, tres artistas de mundos moi diversos, únense para dar a luz este proxecto nado entre o Val de Lourenzá e o occidente asturiano. Voz, piano, saxo, percusión, poema, conversa, emocións, corpo, mazás, moa de afiar e unto son algúns ingredientes dun guiso escénico que se estreará neste maré 21.

Sábado 25 : 19:00H
Praza da Quintana

Timbila Muzimba

Fundada en 1997, esta orquestra Monzanbiqueña de oito membros leva o nome da timbila, un son realizado con xilófonos de madeira típicos da localidade de Zabala, ao sur de Mozambique. A orquestra naceu no barrio Unidade 7, nos arredores de Maputo, un punto de encontro de músicos locais e de orquestras de timbila. Pese a que esta é a súa referencia, o proxecto musical foise enfocando cara á investigación e reinvención do repertorio de música e danza de varias partes do país, xunto coa elaboración de composicións orixinais.

Sábado 25 : 20:30H
Auditorio de Galicia

Maria Arnal
i Marcel Bagés

Dous anos e medio despois de pechar a xira de 45 cerebros y 1 corazón (2017), Maria Arnal i Marcel Bagés estrean o seu novo álbum, Clamor. Neste traballo, o dúo catalán redimensiona o concepto de tradición e introdúceo definitivamente no mañá. Pop mutante que resulta dun proceso creativo capaz de conxugar a memoria lírica de Rodoreda e Verdaguer coas mitoloxías especulativas de Donna Haraway e Ted Chiang, o eco de Violeta Parra e Björk, a colaboración de Kronos Quartet e Holly Herndon.

Abono Sábado 25 : 18:00H
Parque de Bonaval

Néboa

Logo de publicar un EP e varios sinxelos, o quinteto lanzaba a finais de 2020 o seu primeiro longa duración, A realidade Enganosa. A súa interesante proposta musical combina a canción tradicional galega co pop alternativo e a indietrónica. O resultado: un pop-folk con toques de electrónica que pode recordar a Radiohead, Nadadora, Le Mans, Pauline en la Playa ou Nosoträsh. Publicado polo selo raso, o disco está cantado en galego e portugués e foi gravado e producido por Lucas de Centi, no estudio do Náutico de San Vicente, e Hevi no Laboratorio Soyuz.

Abono Sábado 25 : 19:00H
Parque de Bonaval

María Alice
& Jon Luz

Jon Luz e Maria Alice son dous auténticos tesouros vivos da cultura de Cabo Verde e dúas referencias ineludibles da morna, a canción de equilibrio doce e melancólico que foi distinguida como Patrimonio inmaterial da humanidade pola Unesco. Jon Luz, alma e cerebro do Tejo Bar, músico, compositor e produtor multiinstrumentista, e a recoñecida intérprete de mornas e koladeras, Maria Alice, únense en Força Irmon, un disco que alén de clásicos de Paulinho Vieira ou B. Leza inclúen unha chea de orixinais que parten da sofisticada tradición de Cabo Verde mais estenden o seu ollar cara o Brasil; melodías envoltas nunha clase absolutamente atemporal, tan fresca no seu rigor acústico como moderna na súa intención innovadora.

Abono Sábado 25 : 20:00H
Parque de Bonaval

Japa System

O percusionista natural de São Paulo (Brasil), chegou a Bahía con 8 anos. Aos 12 atopouse coa música, e sendo adolescente converteuna en profesión. Co grupo cultural brasileiro Bahía Brasil estivo de xira polo Xapón durante un ano. Volvería dúas veces máis ao país asiático para adquirir coñecementos musicais e culturais, de aí o seu nome artístico. Tamén integrou bandas como Terra Samba, Timbalada ou Banda S.O.J.A., entre outras. Con BaianaSystem, gañadora do 28º Premio da Música Brasileira e dous Grammy latinos en 2017 e 2019, actuou en festivais coma Lollapalooza e Rock in Río. Noutros proxectos paralelos comezou os seus experimentos para crear un sistema que lle permitise novas posibilidades musicais, con artificios tecnolóxicos e así xurdiu o setup musical Nave System. Coas posibilidades que lle ofrece, en maio deste ano Japa sacou o seu primeiro disco en solitario, Sistema Percussivo Integrado, que trae agora á maré 21.

Abono Sábado 25 : 21:00H
Parque de Bonaval

Elkin Robinson

Natural da illa caribeña de Old Providence, Elkin Robinson é un cantautor, músico e produtor de «Caribbean Folk», un son que nace da combinación de diferentes ritmos e estilos caribeños como o mento, calipso, polka e folk. As súas composicións están influídas pola cultura, o estilo de vida e a natureza da súa illa e nelas alaba o mar, a pesca, as relacións humanas e elementos da natureza coma o sol. As letras están na súa lingua materna, o inglés crioulo, un idioma nado da diáspora africana co Caribe e caracterízanse polo seu positivismo e ánimo edificante. Actualmente, Elkin vive en Mallorca coa súa familia. A súa formación en España está conformada por músicos locais no baixo eléctrico e percusións e Elkin coa súa guitarra, voz, composicións e arranxos. Os seus últimos lanzamentos son dous sinxelos: “Heaven in the mountain” e “Looting beyond dih Cosmos”. É embaixador da marca país Colombia.
Abono Sábado 25 : 22:00H
Parque de Bonaval

The Dub Yard presenta High Paw ft. Javier Vicalo

A singjay (cantante e MC) de Vigo, High Paw fará en maré 21 un set de Dub, acompañada por Laura Mercy nos coros. Nos controis estará o coñecido produtor de reggae do estudio The Dub Yard Records Javier Vicalo. O show mesturará dub en directo combinando as instrumentais co repertorio de líricas de High Paw e a súa banda Elephants Yard.

© Fotos Bea Saiáns

Abono Sábado 25 : 23:00H
Parque de Bonaval

Familia Caamagno

O quintento de Sigüeiro volven máis bailongos e enerxéticos ca nunca co seu novo traballo discográfico Había que intentalo, un EP no que despregan todo un compendio de melodías pop, ritmos frenéticos e retrousos coreables co único afán de facer bailar a mocidade.

Abono Sábado 25 : 00:00H
Parque de Bonaval

Mad Professor

DJ, produtor, percusionista e cantante da Güiana, quen fora discípulo de Lee Perry e un dos músicos máis influentes de dub, tamén é un artista recoñecido fóra da comunidade reggae. Amais dunha ducia de discos propios, ten remesturado rock, R&B e música electrónica, con versións de temas para Sade, the Orb, the KLF, the Beastie Boys, Jamiroquai, Rancid e Depeche Mode, entre outros. En 1995 remesturou por completo o álbum Protection de Massive Attack, titulándoo No Protection.

Domingo 26

Domingo 26 : Dende as 12:00H
Parque de Bonaval

Maré celebra o
Día Europeo
das Linguas

Cachirulo, Berlai, Suilma Aali, Davide Salvado, Maria Alice & Jon Luz e Ailá.

12:00H

Cachirulo

13:00H

Berlai

O proxecto musical creado por Xiao Berlai está baseado nunha música sen complexos, que bebe directamente da tradición galega, do indie-pop, do rock e da música electrónica. As letras das súas cancións nacen como imaxes obsesivas do universo galego, onde as berzas son urbanas e o millo necesita de baliza policial. Berlai é indie rururbano, como consecuencia lóxica á música posbravu, e así se transmite nos seus dous discos: Desconhecido e Cas Berlai.

12:00H

Suilma Aali

Formada sobre o escenario tras incontables concertos e traballos de estudio con artistas de renome do Estado español, a artista hispano-saharauí vai do nu soul ao reggae, facendo unha delicada ruta polo jazz e o pop máis actual. O seu ton, a súa forma de fluír e a forza que desprega en cada concerto fana única. Tras anos compoñendo con mimo, Suilma presenta agora o seu primeiro traballo en solitario, Aali, un álbum moi persoal composto por dez obras mestras nas que se coidan todos os detalles.

15:00H

Dj. Carlos Crespo

16:00H

Davide Salvado

Unha das voces máis carismáticas do noso país, que pasou media vida percorrendo vilas galegas na procura de ritmos, cancións e danzas, actuará na maré 21 acompañado das harmonías de Cibrán co seu violín e as composicións de Fergus para crear un son nostálxico e máxico que fala do abandono rural e destaca a importancia de ter terras con xente e cancións con voz.

17:00H

María Alice
& Jon Luz

Jon Luz e Maria Alice son dous auténticos tesouros vivos da cultura de Cabo Verde e dúas referencias ineludibles da morna, a canción de equilibrio doce e melancólico que foi distinguida como Patrimonio inmaterial da humanidade pola Unesco. Jon Luz, alma e cerebro do Tejo Bar, músico, compositor e produtor multiinstrumentista, e a recoñecida intérprete de mornas e koladeras, Maria Alice, únense en Força Irmon, un disco que alén de clásicos de Paulinho Vieira ou B. Leza inclúen unha chea de orixinais que parten da sofisticada tradición de Cabo Verde mais estenden o seu ollar cara o Brasil; melodías envoltas nunha clase absolutamente atemporal, tan fresca no seu rigor acústico como moderna na súa intención innovadora.

18:00H

AILÁ

Fraguada nas noites de foliada da Casa das Crechas, e inspirada nos arquivos sonoros e cancioneiros populares, Ailá agroma na primavera de 2021 disposta a achegar ao público a música de raíz e a súa enerxía universal. Co tradi por bandeira, e cun repertorio que aposta pola hibridación das músicas populares con sonoridades actuais, Ailá quere abrir novas sendas para espallar o amor polo baile e a música tradicional. Os soltos, os agarrados, as xotas, os valses… desde as agrupacións folclóricas até as charangas que conforman a identidade colectiva. E a chave da súa fórmula é tan precisa como a obviedade da que parte a súa premisa: o baile é inseparable da música festiva.

Domingo 26 : 19:30H
Auditorio de Galicia

Gala Cantos na Maré: BUMBA. De Zigala a Zemambiquo... As viaxes de Narf

Co ánimo de intercambio creativo, divulgación da diversidade cultural, e difusión do legado de Fran Perez “Narf”, cando se cumpren cinco anos do seu pasamento, en maré 21 conectaranse unha vez máis Galiza (Zigala) con Mozambique (Zemambiquo), segundo a expresión creada na linguaxe imaxinaria de Narf. Contando coa súa familia artística, na gala de clausura Cantos na maré artistas de Galiza e dos territorios africanos de fala galego-portuguesa darán vida de novo a este espectáculo colaborativo tan querido por Narf.

Un festival, un oceano de experiencias / Esencia Galega / Alma Atlántica /
Un festival, un oceano de experiencias / Esencia Galega / Alma Atlántica /

Non quedes
sen o teu abono.
Mercar.

Inicio Desplazar View
Do 23 ao 26 de Setembro en Compostela
Mercar entradas