Lydia Botana – De aquí para alá coas emocións
Galiza
Lydia Botana é unha música multiinstrumentista coruñesa de espírito aventureiro. Percorre o mundo coma unha bolboreta, compartindo a música que compón e canta en varios idiomas polos cinco continentes. Mestura e aprende diferentes culturas que despois transmite nos distintos espectáculos que produce para todo tipo de público.
«De aquí para alá coas emocións» é un proxecto educativo musical para nenos e nenas no que percorreremos o mundo aprendendo e cantando a música de cada lugar, implicando ao público para que nos acompañe na procura de novos sons. Trátase de espertar o interese dos nenos e nenas pola música e as culturas doutros lugares, poñer en valor a diversidade e por suposto, respectala, dun xeito lúdico e educativo, aprendendo tamén palabras noutras linguas.
A bolboreta máis musical, Bolboreta, a que de aquí para alá percorreu o mundo na procura da felicidade do seu pequeno amigo africano, perdeu as cores das súas ás. Nun primeiro momento non sabe o que puido pasar, pero pouco a pouco comeza a comprender as emocións que sente expresándoas a través da música. Deste xeito, coñecerase mellor a si mesma, aceptándose en todas as súas versións, sentindo tristeza, valentía, envexa, sorpresa, rabia, calma, amor propio, alegría e gratitude. A través de ritmos e melodías, aprenderemos novos instrumentos musicais e bailes cos que seguiremos aprendendo diferentes linguas, cores e costumes de diversas culturas. Será Bolboreta quen de recuperar todas as cores das súas ás nesta nova aventura?
CONCERTO GRATUÍTO ATA COMPLETAR AFORO
