Non é só unha programación musical: é unha toma de posición. Unha aposta colectiva por construír dende as artes un espazo de pensamento, coidado e resistencia.

Vivimos nun tempo complexo marcado por múltiples retos que nos atravesan, dende o global ata o local: a crise climática, a crise da vivenda, a precariedade económica, un modelo de turismo agresivo, a desaparición do galego, o abandono das aldeas, o xenocidio en Gaza… Celebrar un festival con sentido crítico e vocación transformadora nun contexto de hipermercantilización da música é tamén unha forma de facer política dende o común, creando un espazo de construción que nos axuda a recoñecer o mundo e a recoñecérmonos nel.

Maré propón un xeito de mirar, de sentir e de habitar, por iso na programación artística todo ten un porqué. Cada artista convida a unha historia, a unha pregunta, quizais representa un reto cultural. Como nos relacionamos coa nosa lingua? Con quen compartimos a rúa? Que futuro queremos habitar? Que memorias queremos atesourar?

A dimensión estética e a dimensión ética espállanse en múltiples lugares emblemáticos de Santiago de Compostela, unha cidade que fala por si mesma. Maré pretende ser unha marea que todo o toca, activando prazas, salas de concertos, facultades, teatros e centros culturais cun posicionamento claro: este é un festival de Galicia para o mundo que tende pontes cara á lusofonía, as diásporas, as culturas indíxenas… Cada edición Maré convida voces de América Latina, artistas africanos, proxectos de raíz que dialogan co contemporáneo, expresións urbanas e aquelas músicas que cruzan froiteras e xéneros. Achegar estas realidades ao circuíto festivaleiro de Galicia e promover o intercambio cultural é un orgullo para a equipa que promove Maré, sempre respaldada pola implicación das artistas, público e promotores que o fan cada ano posible.