Festival

· 4 días de Festival · +30 Conciertos · Artistas de +10 Países · 2 Estreas Mundiais · 8 Estreas en Galicia
· 4 días de Festival · +30 Conciertos · Artistas de +10 Países · 2 Estreas Mundiais · 8 Estreas en Galicia

maré 21, volve este setembro a Compostela coa súa edición máis ambiciosa en propostas musicais e artísticas das dúas beiras do Atlántico. Warethwa!!!

Máis de
30 propostas

Cunha edición renovada e á altura dos grandes festivais, maré, músicas e artes atlánticas volve do 23 ao 26 de setembro a Compostela. Serán catro días ateigados de actividades dentro dunha programación multidisciplinar que suma máis de 30 propostas musicais e artísticas procedentes dunha decena de países, que sitúan Galiza no epicentro da vangarda creativa mundial.

Diferentes localizacións

maré 21, outrora Cantos na maré, que vai xa pola súa XVII edición, volve este 2021 á cidade de Compostela, onde se asenta, e seguirá a celebrarse en diferentes localizacións coma o Teatro Principal e o Auditorio de Galiza, estendéndose nesta edición cara a emprazamentos do patrimonio monumental, clubes e o parque de San Domingos de Bonaval.

Á vangarda da creación, a diversidade cultural e os movementos sociais

maré 21 aposta pola creación feminina e da mocidade, a experimentación, as novas linguaxes artísticas e a diversidade cultural poñendo o foco naqueles territorios cos que Galiza comparte lazos lingüísticos, históricos e outros sentimentais das dúas beiras do Atlántico. Así, ademais dunha ampla representación galega o cartel inclúe artistas procedentes de Catalunya, Portugal, Colombia, Brasil, Mozambique, Cabo Verde, Güiana, Arxentina, Malí, Inglaterra, Sáhara Occidental ou Paraguai.

Crisol de xéneros musicais e culturas que comparten, no festival maré 21 sonarán melodías pop, soul, blues música electrónica, experimental, rap, dub, reggae ou folk e outras músicas de raíz escritas e cantadas en diferentes linguas con preferencia polas minoritarias e minorizadas: do mambara ao guaraní, o chopi timbilia –o idioma do lema do festival, WARETHWA!!! (avante)–, pasando polo catalán, inglés crioulo ou galego, ademais do portugués e o español.

Co foco posto na defensa dos dereitos humanos e a sostibilidade ambiental

En total, maré 21 sumará máis de 30 actuacións, oito delas inéditas en Galiza e dúas estreas mundiais, nas que os movementos e reivindicacións sociais estarán moi presentes nos repertorios de artistas e actividades paralelas desta nova edición. 

Os dereitos civís antirracismo e LGTB+, a diversidade funcional, o feminismo, indixenismo, a igualdade entre pobos e linguas ou contra o despoboamento rural serán bandeira deste maré 21 xunto ao gran desafío do cambio climático e a persecución da sostibilidade ambiental, en consonancia cos obxectivos de desenvolvemento sostible (ODS) formulados na estratexia de Festivais e Axenda 2030. 

Artistas-activistas como as brasileiras Bia Ferreira, Jéssica Caitano e Luana Flores, a fusión electro andina do arxentino Nación Ekeko, o calypso do colombiano Elkin Robinson ou a paraguaia de orixe guaraní Norma Ávila achegarán parte da gran potencia reivindicativa presente nas “veas abertas” de América Latina. A súa presenza en maré 21 pretende ser unha pequena mostra do que o continente sudamericano está a demandar coa música e outras creacións artísticas como vehículos de expresión e difusión de mensaxes.

Do pop ao folk pasando polo trap e a experimentación creativa feita en Galiza

Galiza contará cunha ampla representación na programación de maré 21. En Bonaval poderase escoitar en directo o dúo de pop con influencias do trap e o R&B máis actual, Verto, ou Familia Caamagno, que volven máis bailongos e enerxéticos ca nunca co seu novo disco Había que intentalo. Estarán tamén unha das voces máis carismáticas do noso país, Davide Salvado, a banda de folk Ailá que presenta o seu disco homónimo Ailá e o quinteto de pop Néboa, premio ao mellor álbum em galego nos premios MIN 2021, entre outros.

maré arte

Nacho Muñoz, Chefa Alonso e Marina Oural, tres artistas de mundos moi diversos, presentarán Maleducadas. Voz, piano, saxo, percusión, poema, conversa, emocións, corpo, mazás, moa de afiar e unto son algúns ingredientes dun guiso escénico que se estreará neste maré 21, xunto coa poesía performativa de Carlos Santiago e o espectáculo Orquesta de Malabares de Pista Catro e a Banda de Música Municipal.

Tres grandes da nova música feita en Catalunya e ¿Os acordáis?, de
Albert Pla

Dous anos e medio despois de pechar a xira de 45 cerebros y 1 corazón, Maria Arnal i Marcel Bagés veñen de estrear o seu novo álbum, Clamor. Neste traballo de pop mutante que agora traen a Compostela, o aplaudido dúo catalán redimensiona o concepto de tradición para introducilo definitivamente no mañá.

Pola súa banda, o músico barcelonés de pop Ferran Palau chega co seu quinto disco, Parc, no que o easyloving e as canciones de amor tórnanse aínda máis sinceras, co minimalisto e sintetizadores a paso lento que o caracterizan.

Tamén actuará nesta maré 21 o recoñecido e polifacético Albert Pla. O artista presentará ¿Os acordáis?, o seu novo espectáculo creado durante o confinamento. Nesta nova proposta veremos un Albert Pla en estado puro, reflexionando con ironía sobre o impacto que a crise do coronavirus tivo a nivel mundial, con esa forza que ten para teatralizar as súas canciones e conseguir un espectáculo dunha poética inusual, devastadora e electrizante.

Galeguía alén da fronteira sur de Europa, de Portugal a Mozambique, Cabo Verde e Brasil

O país veciño e a comunidade lusófona terán tamén unha presenza destacada en maré 21. Dende Portugal, o músico, intérprete e compositor de Elvas, Luiz Caracol, presentará só.tão, o seu EP máis recente. A tamén residente en Lisboa, a exactriz e parte do dúo Orquestrada, Marta Miranda, traerá a este maré 21 unha nova proposta baixo o acrónico MIRA.

Do mundo da galeguía, desa orixe común da nosa lingua que é Galiza, e ademais do Brasil –de onde tamén chegará o percusionista Japa System–, en maré 21 volverán soar ritmos de Mozambique. En concreto, os de Timbila Muzimba, a orquestra de oito membros fundada en 1997 nos arredores de Maputo que leva o nome da timbila, un son realizado con xilófonos de madeira típicos da localidade de Zabala, ao sur do país.

E dous auténticos tesouros vivos da cultura de Cabo Verde, Jon Luz e Maria Alice, referenes da morna, chegan á maré con Força Irmon, un disco cheo de melodías envoltas nunha clase absolutamente atemporal, tan fresca no seu rigor acústico como moderna na súa intención innovadora.

maré 21, un espazo de resistencia a ocupar, diversidade fronte á homoxeneización cultural

Coa máxima da diversidade e o intercambio intercultural, maré 21 inclúe propostas como a compartida polo Trio da Kali e a Real Filharmonía de Galicia. O trío de destacados músicos da cultura mandé do sur de Malí, actuarán nunha coprodución da Real Filharmonía de Galicia e maré coa Orquestra da RadioTelevisión Noruega e o festival Oslo World. Para este proxecto, Paul Daniel director da RFG realizará arranxos instrumentais para corda sobre música orixinal de Jacob Garchik escrita para o disco Ladilikan de Trio da Kali-Kronos Quartet; unha exploración artística única, sen límites, que leva o repertorio musical de hai séculos cara a unha viaxe fascinante a través de sons atemporais.

Con ese mesmo ánimo de intercambio creativo, divulgación da diversidade cultural, e difusión do legado de Fran Perez “Narf” cando se cumpren cinco anos do seu pasamento, en maré 21 conectaranse unha vez máis Galiza (Zigala) con Mozambique (Zemambiquo), segundo a expresión creada na linguaxe imaxinaria de Fran Pérez “Narf”. Contando coa súa familia artística, na gala de clausura Cantos na maré artistas de Galiza e dos territorios africanos de fala galego-portuguesa darán vida de novo a BUMBA, da Zigala a Zemambiquo… As viaxes de Narf.

Dende a Güiana chega o DJ, produtor, percusionista e cantante Mad Professor, quen fora discípulo de Lee Perry e un dos músicos máis influentes de dub, pero recoñecido tamén fóra da comunidade reggae. Amais dunha ducia de discos propios, ten remesturado rock, R&B e música electrónica, con versións de temas para Sade, the Orb, the KLF, the Beastie Boys, Jamiroquai, Rancid, Depeche Mode ou Massive Attack entre outros.

Formada sobre o escenario tras incontables concertos e traballos de estudio con artistas españois de renome, a artista hispano-saharauí Suilma Aali  presenta agora o seu primeiro traballo en solitario, Aali, un álbum moi persoal composto por dez temas que van do nu soul ao reggae, facendo unha delicada ruta polo jazz e o pop máis actual. O seu ton, a súa forma de fluír e a forza que desprega en cada concerto fana única.

E como colofón, o domingo 26, Día Europeo das Linguas, celebrarase unha xornada de portas abertas en Bonaval con diferentes actividades relacionadas coa efemérede e aproveitando a concorrencia de numerosos idiomas nesta nova cita.

Non quedes
sen a tua entrada.
Mercar.

Os abonos e entradas para asistir a maré 21 están á venda e poden adquirirse a través desta web e redes sociais do festival. Debido aos protocolos sanitarios vixentes, os diferentes espazos terán unha capacidade limitada. Dende a organización prégase ás persoas asistentes que respecten as restriccións en vigor para un correcto desenvolvemento de maré 21.

Hai dispoñibles abonos completos que darán acceso a todas as actividades e concertos de maré 21, que tamén pon á venda abonos de día (sábado e domingo) para os concertos de Bonaval así como entradas para algunhas das actuacións por separado, como a de Albert Pla e todas as que teñan lugar fóra dese recinto.

Inicio Desplazar View